Albert Likhanov எழுதிய The Maze என்ற நாவலுக்கு Yuri Ivanov வரைந்த அட்டைப்படம். இது ஒரு சிறுவர் நாவல் (young adult வகையறா). தடிமனான 288 பக்கப் புத்தகம். ருஷ்ய மொழியிலிருந்து ஆங்கிலத்திற்கு மொழிபெயர்த்தவர் Fainna Glagoleva. வெளியீடு: Progress Publishers என்கிற முன்னேற்றப் பதிப்பகம், மாஸ்கோ, 1977.

கீழே இருப்பது endpaperகளில் (முன்/பின் அட்டைக்கு உள்பக்கம் இருக்கும் பக்கங்கள்) பரவியுள்ள ஓவியம். பெரிதாக்கி சுவரொட்டியாக வீ்ட்டுச் சுவரில் ஒட்டிவைக்குமளவு அழகு.

உள்ளே இருக்கும் ஓவியங்களில் சில…

கூகிளில் யூரி இவானோவ் என்ற பெயரைத் தேடினால் யார் யாரெல்லாமோ வருகிறார்கள்.

Alexei Tolstoy தழுவி எழுதிய நாட்டுப்புறக் கதையான Cock Stay-at-Home with the Crimson Comb என்ற சிறுவர் நூலுக்கு Y. Rachev வரைந்த ஓவியங்கள். ஆங்கிலத்திற்கு மொழிபெயர்த்தது Irina Zheleznova. வெளியீடு Malysh Publishers, மாஸ்கோ, 1979. அழகான பெரிய சைஸ் புத்தகம். குழந்தைகள் கொடுத்துவைத்தவர்கள்.

மாலிஷ் பதிப்பகமும் நிறைய சிறுவர் நூல்களை வெளியிட்டிருக்கிறது. பெயரில் மட்டும்தான் வித்தியாசமே தவிர அவை அப்படியே ராதுகா பதிப்பகப் புத்தகங்கள் மாதிரிதான் இருக்கின்றன.

(கடும் பணி, வெளியூர்ப் பயணம், உடல் நலமின்மை ஆகிய மூன்றினால் இந்தப் பக்கம் வர முடியாமல் போய்விட்டது. இனி பிரச்சினை இருக்காது.)

தீப்பெட்டி லேபிள்களைப் போல் வண்ணமயமானவையும் கண்ணைக் கவருபவையும் வேறு உண்டோ? சாத்தியமில்லை.

தீப்பெட்டி லேபிள்கள் மினியேச்சர் போஸ்டர்கள் போல. ஜெர்மன் நாட்கெல்டு நோட்டுகளையும் அவை நினைவுபடுத்தலாம். ஒரு ரூபாய் ஸ்டாம்ப் சைஸில் பல விதமான லேஅவுட்களையும் பார்க்கலாம். அவ்வளவு சிறிய இடத்தில் அடர்த்தியான வண்ணப் பின்னணியில் அடர்த்தியான கோடுகளைக் கொண்ட கோட்டோவியங்கள் மட்டுமில்லாமல் ‘முழுநீள’ மல்ட்டிகலர் ஓவியங்களைக் கூட அவற்றில் பார்க்கலாம். அவற்றில் நவீன கால (அரூப டிசைன்கள் போன்றவை) வடிவமைப்பும் உண்டு, பாரம்பரிய வடிவமைப்பும் (எ.கா., அலங்காரங்கள், கோவில்-குளம்) உண்டு.

தீப்பெட்டி லேபிள்களில் இருக்கும் குறும்படைப்புகளில் பலமான கிராமப்புற அல்லது மொபசல் வாசனை அடிக்கிறது. அவற்றின் சிறப்பும் அதுதான். அவற்றில் இடம்பெறும் படங்கள் எல்லாமே பயிற்சிபெற்ற கலைஞர்களால் வரையப்பட்டிருக்க முடியாது. ஆனால் அவற்றில் உள்ள ஒருவித அப்பாவித்தனமும் (naïveté) கற்பனையும் ஈர்க்கின்றன.

சிலவற்றில் நாட்கெல்டு நோட்டுகளுக்கே உரிய லேஅவுட் இருப்பதும் ஆச்சரியமாக இருக்கிறது (கடைசியில் பார்த்தால் இதை நாட்கெல்டு பதிவிலேயே சொல்லியிருக்கிறேன்).

தீப்பெட்டி லேபிள்களை சேகரிக்கும் பொழுதுபோக்கு 1960களில்தான் தொடங்கியதாக விக்கிபீடியா சொல்கிறது. இங்கே பத்தாண்டுகள் தாமதமாகத் தொடங்கியிருக்கக்கூடும். மேலை நாடுகளில் அச்சுத் துறையும் கிராஃபிக்ஸ்/வடிவமைப்புத் துறையும் நம்மை விட சில பத்தாண்டுகள் முன்னணியில் இருந்ததால் மேலை நாட்டு தீப்பெட்டி லேபிள்கள் இன்னும் அழகாக, தரமாக இருக்கின்றன. இருந்தாலும் நம்முடைய பாணியும் தனியாகத் தெரியத்தான் செய்கிறது.

எனது பிள்ளைப் பருவத்தில் 80களில் வெளிநாட்டு அஞ்சல் தலைகள், நாணயங்கள், ரூபாய் நோட்டுகள், பழைய இந்திய நாணயங்கள் உட்பட தீப்பெட்டி லேபிள்களையும் சேகரித்திருக்கிறேன். இப்போது 30, 40 சொச்சம் வயதானவர்களுக்கு மட்டும்தான் அந்தப் பொழுதுபோக்கு இருக்கும் போலிருக்கிறது.

ஹான்ஸ் க்ரிஸ்டியன் ஆண்டர்சனின் ‘The Fir Tree’ என்ற கதையின் புத்தக வடிவத்திற்கு நான்சி எக்ஹோம் பர்க்கர்ட் (Nancy Ekholm Burkert) வரைந்த ஓவியங்கள். Harper & Row, Publishers, நியூயார்க், 1970இல் வெளியிட்டது. முதல் பதிப்பு 1950. படங்கள் இந்தப் பதிப்பில் சேர்க்கப்பட்டன. மொழிபெயர்ப்பு: H.W. Dulcken. மேலிருப்பது அட்டை.

கீழிருப்பது போன்ற பென்சில் ஓவியங்களும் இந்தப் புத்தகத்தில் நிறைய இருக்கின்றன.

நான்சி எக்ஹோம் பர்க்கர்ட் சிறுவர் நூல்களுக்கு வரைந்த முக்கியமான ஓவியர்களில் ஒருவர். அமெரிக்காவில் சித்திரக் கலைக்கு (illustration) தரப்படும் கால்டகாட் விருது (Caldecott) உட்பட சில விருதுகளைப் பெற்றவர்.